May 7, 2008 13:15 tarixində, Vüsal Məmmədov tərəfindən,
"oriyentir" bölməsində yazılib
Şərhlər(15)
Oxunub:307Prosesi başladan EsmaNur oldu və ona “oyun” adını qoydu; hərçənd, mən belə deməzdim, amma olsun. EsmaNur pası Fərhada atdı, Fərhad da Maisə, Raufa və mənə. Bir-birimizi daha yaxından tanımaq üçün lap çıxıb qayada gicitkən yığmağa da hazıram. Başlayım özümdən. Sualların EsmaNur tərtib edib.
1. Adın ve Soyadın
Vüsal Məmmədov. Niklər arxasında gizlənməyi sevmədiyimdən, demək olar ki, hər yerdə öz adımla çıxış edirəm.
2. Təvəllüdün
23 avqust 1978-ci il. Burada bəxtim gətirməyib: hansı bürcdən olduğumu heç cür dəqiqləşdirə bilmirəm. Hərçənd, astrologiyanı boş şey saysam belə, yenə də maraqlı olardı…
3. Nə ilə məşğulsan (sənət, peşə..)?
BDU-nun Beynəlxalq Münasibətlər fakültəsini bitirmişəm; bəlkə də fakültə məni bitirmişdi, amma bu artıq ayrı söhbətdir. Hər halda, ixtisasımı bilmə səviyyəmdən narazılığım əsasən yoxdur. Amma peşəm lap tələbəlik illərindən jurnalistika olub. Yəni 1998-ci ildən. Hərçənd, Azərbaycanda jurnalistika elə biabırçı gündədir ki, çox zaman çox yerdə peşəmi deməyə utanıram. Bəzən ötəri tanışlara sadəcə deyirəm ki, “müəlliməm”. Və bu da həqiqətdir – Xəzər Universitetində dərs deyirəm. Dərindən maraq göstərdiyim başqa bir sahə də var, amma qoyaq, hələlik sirr qalsın.
4. Harada yaşayırsan və hansı şəhərdə yaşamaq istərdin?
Bakıda. Amma istərdim Şimal ölkələrinin birində yaşayım. Skandinaviyada, məsələn, ya Kanadada… Bəd başına Şərqi Avropa da gedər. O da olmasa, qanunların işlədiyi istənilən ölkə. Ölkənin yaxşısı-pisi olmur, var qanunlar işləyəni, var işləməyəni; təəssüf, indi mən ikincisində yaşayıram.
5. Yaşam fəlsəfənizi təşkil edən sözərdən, cümlələrdən biri?
Çətin sualdır. Həyata öz baxışlar sistemim var, ama bir cümləylə ifadə etmək çətindir. Təxminən, kobud şəkildə bu cür formulə edərdim: Dünyada MÖVCUD OLMAĞA yox, YAŞAMAĞA çalış – bəlkə də alınacaq.
6. Sənin üçün blog nədir?
Daha bir ünsiyyət sferası. Amma real insanlarla. Virtual personajları, obrazları sevmirəm. Onlar mənə oyuncaq kimi gəlir.
7. Bloq həyatında nə qədər və necə bir yer tutur?
Hər halda, az yer deyil. Gündə bir neçə dəfə baş çəkirəm, görüm nə var-nə yox? Maraqlı şərh oxuyanda, nə gizlədim, özümlə bağlı xoş sözlərlə rastlaşanda sevinirəm… Bəzən tikanlı fikirlərdən cırnayıram… Bu qədər şey necə az ola bilər?
8. Nəyə görə blog yazırsan?
Jurnalist kimi auditoriyam var, az da deyil - bunu bilirəm. Amma bloq – bir növ daha yaxın, dost, haradasa məhrəm… belə deyək, şəxsi auditoriya yaradır. Buna qədər mən oxucularımla çox az ünsiyyətdə ola bilirdim. Yazılarıma əks-reaksiya tanış olmaq imkanım az idi. Amma bloq bu imkanları verir.
Suallar burada bitir. Əlavə sual vermək istəyən olsa, şərhlərdə yazın, məmnuniyyətlə cavablandıraram.
***
Oyunun şərtlərinə görə, mən də kimi və ya kimlərisə dəvət etməliyəm. Bu şəxslərə pas ötürmək istərdim:
Cavidan – Aznet-in Ryabinası, yəni Quşüzümü, əslindəsə qızılgülü, yaxud bir az yabanı olduğu üçün hələlik itburnu kolu... (Vallah, mən itburnunu qızılgüldən çox sevirəm - heç olmasa çaya atıb, ətrindən məst olmaq olur...) Həm yazar, həm də insan kimi mənə çox maraqlıdır. Bu qədər cəsarətli fikirlərilə əgər 18-ci əsrdə yaşasaydı, indi adı məşhur filosofların sırasındaydı bəlkə də.
Nurlan – Həm lotu, həm savadlı, həm patriot, üstəlik, Oskar almış müəllimin tələbəsi və ən əsası, əla oğlan! Bu keyfiyyətlərin bir insanda cəmləşməsi artıq onu maraqlı edir.
Aygün İslamzadə - Gerçək bir PR dahisi :) , bu bloqun ilk və sadiq oxucularından biri, комсомолка, спортсменка, красавица… :) Əlbəttə, zarafatdır, bu xanımı şəxsən tanımıram. Amma cavablarını oxumaq maraqlı olardı.
Gahramanov – Hamının şeir yazdığı bir məmləkətdə fizikayla məşğul olması özlüyündə böyük şeydir. Hətta gələcəkdə Azərbaycanın Eynşteyni olmasa belə, mənim üçün maraqlı şəxsiyyətdir.
Əlbəttə, bir də EsmaNur-un özü. Neçə aydır dost bloqlarıq, körpəsi gözümüzün qabağında böyüyür, amma hələ də bilmirəm ki o, türkiyəlidir, yoxsa azərbaycanlı :) ...
İzninizlə, bir neçə sual da özüm əlavə edərdim.
9. Fərz edək ki, Allah sənə öz xalqının konkret bir xasiyyətini əlindən almaq qüdrəti verdi. Onun hansı cəhətini ləğv edərdin?
10. Sizcə, hər bir insan öz cütünü axtararkən gələcək həyat yoldaşından daha çox nə umur?
11. Öz həyatınızdan nəyi çıxarmaq və nəyi əlavə etmək istərdiniz?
12. İndiki ağıl və dünyagörüşü yeniyetməlik vaxtı olsaydı, o zaman hansı peşəni seçərdiniz?
13. Sizcə, pulun hansı yolla qazanılmasının fərqi varmı?
14. Master Yoda kimdir? Ona münasibətiniz :) ?
Hem mence genişlede bilerik,bu suallar biter,yeni yeni suallar oyunlar başlayar.. yene de deyirem bu artıq blogculara qalır 
Vüsal cavablar üçün və oyunda iştirak etdiyin üçün çox saqol. əlavə etdiyin sullar çox əladılar.
inşallah oyuna dəvət etdiyin blogçularda iştirak edərlər.
Amma məncə gərək Esma nuru dəvət etmeydin. o yalnız sənin suallara cavab yazacaq, oyun qanunları əsasən daha kimsəni dəvət edə bilmiyəcək. çünku o artıq dəvət edib
May 7, 2008 13:25